Politics

TALA I VAIFANUA | American Samoa

Pago Pago – AMERIKA SAMOA

 

FAITAUGA O E UA A’AFIA I LE VERUSI COVID-19

 

Ua fa’amaonia e le Matagaluega a le Soifua Maloloina le toe fa’aopoopo o le 42 sui fou ua maua i le Covid-19,  e fa’aopoopo atu i le aotelega sa lipotia mai ia Mati 26 e na’o le 3,381 lea ua maua ai le aotelega fou e mai ia Mati 27 e 3,422 i latou ua maua i le Coronavirus.

 

Ua le gata ia lea ua fa’amamaina le to’a 32 o i latou mai le Covid-19 ma ua maua le aotelega o i latou ua toe malolosi mai e 532, o lona uiga o le aofai o e ua mautu nei o lo’o a’afia pea i le Coronavirus ua na’e le 2,891. O lea ua tula’i mai e moni lava le fa’aiteite a le afioga le ta’ita’ifono o le Komiti Fa’afoe o le Covid-19 i le tatou atunuu, e iloga mai se tau fa’aifo o le a’afiaga o le atunuu i le vaiaso lenei, Mati 27, 2022 se’ia oo ia Aperila 02.

 

Mai le tulaga o e o lo’o taofia, ua fa’amauina mai sa to’aiva i latou na taofia mai le fa’aiuga o le vaiaso, e to’atasi lea ua toe fa’aopoopo i le afiafi o le aso Sa ma ua atoa ai le to’a ten ua fa’ataotolia i le falema’i Covid-19 i Faga’alu mo togafitiga.

 

O nisi o fa’amaumauga o lo’o tumau ai le fitu, ae peita’i ua fa’ailoa e le DoH, o le aoina mai o fa’amaumauga a le Falema’i i Faga’alu e fa’ato’a fa’amauina lea i le toega o itula o aso ta’itasi, ma o le faitauga lea o lo’o faamauina mai nei i le fa’aiuga ai o galuega i le afiafi o le aso Sa na te’a nei.

 

Mo nofoaga e faia au tui puipui o le COVID-19 ma suega o lea fa’ama’i telefoni i le 219. 

 

I le taimi nei ua tula’i mai le aofaiga o e ua faia tui puipuia i le atunuu atoa ua oo i le 82.8% ae o le aofaiga o e tatau ona faia tui puipuia o le atunuu atoa e 91.1% e afua mai le lima tausaga se’ia oo i le matua e gata ai e o soifua i le atunuu.

 

Ua fa’aauau lava fo’i ona tautuaina gasegase ua tusia fa’apitoa i moega i tua i aiga e le vasega o foma’i a le tatou Matagaluega o le Soifua Maloloina, ma afai e fia maua lea fesoasoani, valaau i le laina 219 ua fa’apito augafa mo le sootaga vave e fa’ao’o atu ai le tautua poo ni fa’afesili.

 

O le fa’asa atoa lenei o le Covid-19 ua fa’alagolago i le vasega o Leoleo e latou te fa’amalosia aiaiga uma i le va feagai ai ma le mamalu o le atunuu. E aofia ai i lea tulaga o le fa’amalosiga fo’i o le mautinoa o nonofo fa’anofoesea tagata i o latou aiga, ma tausia uma aiaiga o le feagaiga na osia ma le DOH ina ia mautinoa e le o salalau atili le fa’ama’i i lo latou lotoifale fa’atasi ai ma isi o le mamalu lautele o le atunuu pe a le nofoesea lelei.

 

Ua fa’ailoa mai, ”Eese mai isi lava mea na tutupu, ua i ai nisi ua fa’asoesa lava i o latou aiga ma e nofotuaoi, ua leai se isi fa’aiuga e ao ina faia, ae o le aumai loa e taofia i le to’ese e tatalia ai lona fa’amasinoga. Ae ua tatou silafia e le o faigofie fo’i le nofoaga ona o lo ua a’afia le to’atele. Peita’i ua oo i le to’alua lea na saisaitia maia le ali’i fa’asoesa, ua tau fai maua uma i le fa’ama’i i le taimi nei, ina ua faia la’ua suega i lea lava aso. O lo’o ua fa’ailoa mai, e fa’ailoa mai i le suega a le sui na fa’asoesa, o lo’o maua ai fo’i le verusi Covid-19.”

 

TA’ITA’IFONO TUIOLOSEGA: AOFIA MANA’OGA KOVANA GALUEGA FUAFUA LBJ:

 

O le ta’ita’ifono o le Komiti Fa’afoe o le Falema’i tele o le LBJ Medical Center  Dr Malouamaua Tuiolosega na ia fa’ailoa atu i le Kovana Sili, Lemanu Peleti Mauga, “Ua aofia ma ua fa’asilisilia i a matou galuega fa’ataoto e ao ina mataituina ma fa’atino mo le aluga lelei o le falema’i LBJ Medical Center, ou manaoga fa’apitoa ua mae’a folasia mo i matou e ao ina fa’ataunuu.”

 

O mea nei ua ia lisia maia:

 

• Ia toe fa’atulaga lelei totogi o tagata faigaluega ia talafeagai ma tofiga o lo’o ua latou faigaleuga ai 

• Ia fa’afaigaluega mai o tatou tagatanuu, ia fa’amuamua lava, pe afai ua i ai agava’a tau Foma’i, tausma’i, Techs ma nisi ua i ai tomai fa’apitoa i soo se tiute e tausia lelei ai le soifua maloloina o le atunuu.

• Ia faia a’oa’oga fa’apitoa, ia aoao tomai eseese ia taua’aoina tusi pasi e fa’amaonia ai mo e uma o le a faigaluega i le tatou Falema’i i so’o se galuega e tautua ona ua agava’a ai.

• Ia iloga ona fa’aofi i le aoaoga fa’apitoa ma tofiga e faigaluega ai, lou silafia ona fa’aaoga masini fa’atekonolosi o lenei vaitau ia mafai ona fa’atino ai galuega uma i so’o se taimi ia mautu fa’amaumauga o soo se faiva.

• Solaupule ni aiaiga mo le falema’i fou ma ia fa’ailoa mai ni manatu lelei a le komiti fa’afoe mo se fa’aiuga i lea mataupu.

 

O Dr. Tuiolosega, sa ia fa’aalia lava ia Kovana Lemanu i sana tusi ua fa’aoo atu, “Ua faia le fa’aiuga a le Komiti Fa’afoe o le a matou le toe fa’amasinosino nisi pe tu’ua’ia nisi ae ua autasi i matou ina ia faia lo matou tiute na tofia ai i matou, ia siitia le galuega tautua o le fa’afailele o le soifua o le mamalu lautele o le atunuu i le LBJ Medical Center.”

 

Ua i ai fo’i se tusi fa’alaua’itele sa saunia e le afioga le Kovana Sili e fa’aoo atu i le Komiti Fa’afoe o le Falema’i ma ua muamua lava ona ia fa’afetaia le latou tula’i mai ma le latou tautua fo’i ua fa’atino mo le falema’i ma le latou fa’anaunauga fo’i ina ia toe fa’aauau ona latou taumafai e soo le fau ma le fau i o latou tiute fa’atino ia gasolo lelei galuega uma e tautuaina ai le soifua maloloina lelei o le atunuu atoa.

 

Ua fa’ailoa atu e Lemanu i le komiti, “O lo ua tatou i ai nei i le taumafaiga e taofiofi le sosolo o le Covid-19 i le atunuu, o lona uiga o tatou taumafaiga uma e ao ina fa’amuamua lea galuega i ona itu uma o le tautua. O i tatou lava e ao ina mautu ma tumau i le taumafaiga lenei, ina ia mautinoa e o tatou tagata o lo’o malupuipuia lo latou saogalemu ma o latou soifua i o tatou a’ao.”

 

Na talileleia fo’i lea fanoga e le ta’ita’ifono ma lana Komiti Fa’afoe ma ua ia fa’afetaia e Lemanu mo lona finagalo fa’aalia, o lana tofa mamao ua manino fo’i le latou itu o le auaunaga, i fanoga e ao ina fa’atino e i latou ma ave i ai le latou fa’amua i lenei vaitau o lo’o pesia le atunuu i le Covid-19.



Source hyperlink

Leave a Reply

Your email address will not be published.