Politics

TALA I VAIFANUA | American Samoa

Pago Pago – AMERIKA SAMOA

FOA’IA  UH-COHORT VASEGA 35 – AUFAIGALUEGA LBJ MEDICAL CENTER MO SUESUEGA COVID-19:

O le aso Faraile talu ai na fa’ataunuu ai i le 1:00 i le aoauli le foa’i a le vasega o ali’i ma tamaitai Faia’oga o sailia o latou tusi pasi maualuluga i le Polokalama a le UH Manoa ma le ASDOE COHORT #35, mo le aufaigaluega a le Falema’i tele i Faga’alu LBJ Meical Center, i latou o lo’o tiute ina ia mafai ona fa’ao’o mai fesoasoani eseese o moomia e le lautele o le atunu’u, o lo’o gasolo atu ina ia togafitia, pe sailia fo’i poo a’afia i le Covid-19.

O lenei foa’i, na mafua ona matua’ina ona o se talosaga sa fa’auia atu e le susuga  Dr Ledua i luga o le ea ma sootaga o le Facebook ina ua ia silafia lelei o lo’o i ai lea mana’omia e le aufaigaluega a le tatou Falema’i tele. 

O sui e to’atolu o le vasega fa’ai’uaso o lenei tausaga UH COHORT #35 na oo ane latou te fa’auia lenei meaalofa i le pulega o le falemai tele i Faga’alu. O le susuga le Pule Sili le tumau ia Moefa’auo WIlliam Emmsley sa na ia taliaina le foa’i.

“O le matou savali ua na’o na molita’i mai le meaalofa ua mafai ona tuufa’atasia e le matou vasega UH Cohort #35, e to’a 17 i matou uma, ae ua avea i matou ma sui e molita’i maia ina ia tali se vala’au ia fesoasoani mai i le aufaigaluega galulue mo togafitiga, suesuega ma tuiga o le Covid-19, lea ua a’afia ai le atunuu. Ona o le agaga alofa ua talia ai se fautuaga mai o matou taita’i, i le pulega a le UH-COHORT fa’atasi ma le pulega a le ASDOE i le susuga le Fa’atonu ma le pulega, ina ia faia ni matou tautua alofa mo nisi o le atunuu lautele o lo’o i ai le mana’omia.”

Sa fa’aauau lana folasaga, “E ui fo’i ina fa’atauva’a le foa’i, ae paupau ia tau i Lepea, e pei o lena upu a le atunuu. O le agaga e afua ai se foa’i ia sili ona taua i lo ni mea ua taulimaina mo le mamalu o le aufaigaluega galulue i itula tuga o le po, ae o lo’o momoe le to’atele o le atunuu.”

Sa saunoa o ia e tali fuaitau ile foa’i ina ua mae’a le saunoaga a le fofoga o le vasega mo le latou foa’i, “E pau lava le upu e mafai ona faia e lenei pulega ma le aufaigaluega atoa a le tatou falema’i tele i Faga’alu, ona ua to’ia o matou tagata fa’atauva’a i le fa’aaloalo maualuga, o le faafetai! Mai le agaga o le fa’afetai, ua ta fa’atalofa ai ma avatu le fa’afetai tele i le vasega fa’au’u #35 COHORT ma le pulega o le UH Manoa ae mai le pulega fo’i o le ASDOE ona o nei polokalama aoga o lo’o latou fa’atulaga mo outou e faapasia ai a outou a’oa’oga faapitoa mo tusi pasi maualuluga.”

AOFIA LE ALO AFAKASI SAMOA  MANA’O E FA’ATU “FU’A A SAMOA & AMERIKA SAMOA” MAUGA O EVERESI:

O le aumalaga muamua lava a nisi o atali’i lanu mai Ethiopia ma USA ua latou i ai nei i le a’ega o le Mauga o Everesi i Initia. O le mauga lea e sili ona maualuga i so’o se mauga ua fa’amauina i le lalolagi. Peita’i, o le to’atasi o le au a’e mauga lenei, ua aofia ai ma se tasi o atali’i Manoah Ainuu mai le Spokane, Washington.

O Manoah Ainuu, o le atali’i o Rev. Layne Ainuu mai i Spokane, o se tasi o atali’i o le auaiga o Ripley i Leone Amerika Samoa, ma Ainuu mai Sapapali’i i Savaii.

“O le taimi nei ua amatalia le taumafaiga a le ‘au a’e mauga lenei mai Ethiopia ma Amerika, ua na’o uso lanu lava, ae ua auai ma lo’u atali’i. Na amata a’e ia Fepuari 22, 2022, ma o le taimi nei, masalo ua latalata ona to’ai taunuu i le tumutumu o le mauga, ae o lo’o malaga lava si ou atali’i ma Fu’a a le Malo o si o’u tina ma lo’u tama, Samoa ma Amerika Samoa, fa’apea ma le fu’a o le Malo o lona tina o Ethiopia, afai ae fa’amanuiaina, o le a ia totoina i le tumutumu mauga o Everesi, ina ia fa’amauina lana taumafaiga i o ma’ua aiga. Alofa mai ma tapua’ia lana taumafaiga, Samoa e, o se pau o se mea e fa’ailoa ai se taumafaiga a le atali’i.” O se talatala mai lea a le susuga le Faife’au Layne Ainuu.

Ua le gata ia Manoah Ainuu ae o lo ua malaga ai ma lona to’alua, Rachael Ainuu o lo’o la’ua a’e mauga fa’atasi. O le aumalaga atoa e to’afitu ia Manoah ali’i ae to’alua tamaitai i lona to’alua. 

Ua fa’ailoa mai afai e te fia maimoaina ma tulimata’ia le a’ega lenei a le ulua’i ‘au a’emanuga o tagata lanu uma, e mafai ona e maua i le sootaga o le PEOPLE.com i le sootaga o le The Full Circle Everest. Ua i ai i latou i Nepal talu mai Fepuari 22, 2022 ina ia amatalia tapenaga uma lava, ae ua fuafua e i latou o le a mafai ona maea lea taumafaiga i se aso o Aperila 2022.

Fa’ailoa e Rev. Layne Ainuu, “O lo’u atalii sa soifua a’e lava i Spokane, tau leai fo’i ni Samoa i lea lava nofoaga o matou o fa’amautu ai nei, peita’i o a’u na ou ola a’e i Los Angeles ae o o’u matua uma o Samoa. Afai o le a manuia le taumafaiga lea a le a’u a’e mauga lea o le a fa’amauina ai le na’o le to’a 10 lava o nisi o se ‘au a’emauga lanu ua a’ea le mauga o Everesi e tusa ai ma fa’amaumauga mautu a i latou ua taumafai nei.” 

Ua fa’ailoa mai e Layne Ainuu lona olaga mai, “O a’u o se atali’i o Taliloa Ainuu mai le Auaiga o Ripley i Leone. O matua o lona tama o le tina o lona tama o Sarah Ripley, o le afafine o Ned ma Saitaua Rupley o Leone lava. Peita’i o le tama o Taliloa Ainuu o lona tama lea o La’ai Ainuu mai le afio’aga o Sapapali’i Savaii. Ua oo o ia i lona aiga Savaii, ae ua tele fo’i taimi ua asiasi mai ai i lona aiga i Leone, Amerika Samoa, lea e tele ai fo’i lona iloa o lona aiga. E ui la ina ou ola a’e i Los Angeles ae matua ou naunau i la’u aganuu fa’asamoa ma ou taumafai e tautala ma le malamalama i le Gagana Samoa. Ua feololo lava.”

“O si o’u tina o Matilda Harrington mai le afioaga o Fagatogo, ae o le pui aiga Samoa o lo’u tina o Savea Moe ma le Auaiga Sa Tuitogamaatoe e oo fo’i i Pavaiai.”

I le olaga o le atali’i a’e mauga o Manoah Ainuu, ua ia fa’ailoa mai, “Sa tupu a’e lava Manoah i Spokane, ma a’oga ai mai le tulaga muamua ma le aoga maualuga. O le atoaga o lona 18 tausaga na malaga atu ai loa i Bozeman, Montana ina ia ulufale i le Iunivesite o Montana State University. E le’i fa’au’u mai o ia i lana kosi sa filifili ae ua matele o ia ina a’e mauga ‘Aisa ma a’e Mauga Ma’a, o agava’a ia ua matele ina fa’akonekarate vave ai o ia ae le’i mae’a ana aoaoga. Lea lava la ua fealua’i solo o ia i avanoa ua ia maua, ma ua lelei ai fo’i lona silafia i na matata.”

O le susuga Layne Ainuu o lo ua avea nei ma Faife’au o le Falema’i i Spokane, ae o se tasi o ana galuega fa’amisiona na oo ai o ia i Ethiopia ma ua fetaui ai ma le tina o Manoah Ainuu, le tina o le galuega Almaz Mohammad – Ainuu, o le tagatanuu o Ethiopia. 

“O le ala lea o le avatua e le atalii o Manoa Ainuu le tagavai a nuu e tolu o ona matua i le mauga o Everesi, Samoa, Amerika Samoa ma Ethiopia. Ou te iloa e i ai le alagaupu a lo’u atunuu, O faiva e tapua’ia, e manuia! O le ala lea o le fa’atoga ina ia tapua’ia faiva o le atali’i i se mea fo’i ua agava’a ai mai le Atua o manuia eseese uma. Fa’afetai tele lava. O la outou pule lea Samoa na lua.”

O se toe tala lea a le susuga le Faife’au Spokane.

 TAVAI O LE AOFA TUNOA MISINISTRIES:

O le aso Faraile na te’a na fa’atautaia ai le sauniga fa’apitoa e fa’afetaia ai le Atua ona o lana meaalofa sili ona taua ia Pr Elia Atiumaletavai, le fanau ma le pa’ia o aiga, ae maise o le Ekalesia sa la’ua fa’atuina ma galulue i ai, Le Alota Tunoa Ministries i Lepuapua, Leone.

E ui i se manatu ina ia auai o le to’atele sa latou fia molimauina lenei toe sauniga ma le latou tina o le galuega, sa fautuaina le Ekalesia ina ia fa’atasi atu i le agaga e ala i talosaga, ae ua na’o e ua fili fa’apitoa ina ia auai, ae maise ai o le vasega o talavou sa faia lo latou sao i le sauniga mamalu i le Malu o le Atua ae maise o le Maota o le galuega mo le ‘aiga ina ua mae’a sauniga uma e lua mo le tina.

O le itula e 8:00 na amata tonu ai le sauniga paia i le malumalu i Lepuapua, peita’i o le sauniga o lona fa’alelauasiga ma lagomau ai o ia i lona aiga i Vaitogi le toe sauniga o le aso.

I le sauniga i le malumalu na fa’afofogaina molimau a nisi o fanau fa’aleagaga o le ulua’i vasega fa’aiuaso o le la’ua a’oga fa’afaife’au na fa’atula’ia i Lepuapua, peita’i ua tautua nei i le A’ai tele o Seattle Washington. O le molimau fa’aatali’i o le Talalelei, ona o le tina o se tasi e tu malosi i tapula’a ia ausia e le vasega o e o a’utauina mo le taua fa’aleagaga. Ua le gata ia te’i latou a’o latou taito’alua fo’i ua saunia mo le galuega.

“E le alo le fa’atonu, e le alo ai fo’i ma le sasa poo le ta i le tua o le vale, e le mapu i le taulogologo ma le fia talatala poo a mai le galuega, e le mate fo’i le lamepa o le su’esu’e atili i le finagalo o le Atua. E mataala i ona tiute fa’atina o le galuega, ae maise o le tina ma o le faletua o le ta’ita’i.” 

Molimau foi le fanau, e na’o le to’alua lava i la’ua, Heinrich Johannas Tavai ma Elijah Jared Wendt Tavai lea sa la’ua fa’ailoa ai e le o faigofie ia i latou ma le tama o le aiga, le susuga Bishop Dr Rev Elia Esera Tavai, le tu’ua ai e le latou tina o le mafutaga. 

“O ia o se tasi e alapo i le taeao ma amata fa’atino ona tiute i lona Atua, e tatalo fa’atauanau i manuia o le Atua mo lona aiga ae maise o le Ekalesia ma ana galuega tala’i ma fesoasoani mo soo se tasi ma fa’ailoa atu i ai le alofa tele o le Atua. O le a misia lona leo, misia lona tima’i i mea lelei, misia lana ote i le fa’atonuga o ma’ua, poo le a lava le matutua, e le tu’ua lana sasa. E le tasi ae tele taimi e sasa ai ma faatonu. E iloa lona alofa, aua e a’oa’o, a’oa’i ma fa’atonu i ma’ua mai le Tusi Pa’ia.”

O lona sauniga sa avea ai le susuga Rev. Pa’au mai Faga’alu EFKAS ma fofoga taumolimoli o le Upu a le Atua. Na fa’atasia mai fo’i ta’ita’i mai Amerika o le Alofa Tunoa Miinistries ma o ia lea sa ta’ita’ia lona toe sauniga i lona Oliolisaga Tumau i lona Maota i Vaitogi ua lagomau ai. [Molimau a le tama i se lomiga mulimuli mai]



Source hyperlink

Leave a Reply

Your email address will not be published.